श्री राधा कृपा कटाक्ष स्तोत्र

🌸 श्री राधा कृपा कटाक्ष स्तोत्र (पूर्ण पाठ)

मुनीन्द्र-वृन्द-वन्दिते त्रिलोक-शोक-हारिणि,
प्रसन्न-वक्त्र-पङ्कजे निकुञ्ज-भू-विलासिनि।
व्रजेन्द्र-भानु-नन्दिनि व्रजेन्द्र-सूनु-संगते,
कदा करिष्यसि मां कृपा-कटाक्ष-भाजनम्॥ 1॥

अशोक-वृक्ष-वल्लरी वितान-मण्डप-स्थिते,
प्रवाल-ज्वाल-पल्लव प्रभारुणाङ्घ्रि-कोमले।
वराभय-स्फुरत्करे प्रभूत-सम्पदालये,
कदा करिष्यसि मां कृपा-कटाक्ष-भाजनम्॥ 2॥

अनङ्ग-रङ्ग-मङ्गल-प्रसङ्ग-भङ्गुर-भ्रुवां,
सुविभ्रम-ससम्भ्रम-दृगन्त-बाण-पातनैः।
निरन्तरं वशीकृत-प्रतीत-नन्दनन्दने,
कदा करिष्यसि मां कृपा-कटाक्ष-भाजनम्॥ 3॥

तडित्सुवर्ण-चम्पक-प्रदीप्त-गौर-विग्रहे,
मुखप्रभा-परास्त-कोटि-शारदेन्दु-मण्डले।
विचित्र-चित्र-सञ्चरच्चकोर-शाव-लोचने,
कदा करिष्यसि मां कृपा-कटाक्ष-भाजनम्॥ 4॥

मदोन्मदाति-यौवने प्रमोद-मान-मण्डिते,
प्रियानुराग-रञ्जिते कला-विलास-पण्डिते।
अनन्य-धन्य-कुञ्जराज-कामकेलि-कोविदे,
कदा करिष्यसि मां कृपा-कटाक्ष-भाजनम्॥ 5॥

अशेष-हाव-भाव-धीर-हीर-हार-भूषिते,
प्रभूत-शातकुम्भ-कुम्भकुम्भि-कुम्भ-सुस्तनि।
प्रशस्त-मन्द-हास्य-चूर्ण-पूर्ण-सौख्य-सागरे,
कदा करिष्यसि मां कृपा-कटाक्ष-भाजनम्॥ 6॥

मृणाल-वाल-वल्लरी-तरङ्ग-रङ्ग-दोर्लते,
लताग्र-लास्य-लोल-नील-लोचनावलोकने।
ललल्लुलन्मिलन्मनोज्ञ-मुग्ध-मोहिनाश्रिते,
कदा करिष्यसि मां कृपा-कटाक्ष-भाजनम्॥ 7॥

सुवर्ण-मालिकाञ्चिते त्रिरेख-कम्बु-कण्ठगे,
त्रिसूत्र-मङ्गली-गुण-त्रिरत्न-दीप्ति-दीधिते।
सलोल-नीलकुन्तले-प्रसून-गुच्छ-गुम्फिते,
कदा करिष्यसि मां कृपा-कटाक्ष-भाजनम्॥ 8॥

नितम्ब-बिम्ब-लम्बमान-पुष्प-मेखलागुणे,
प्रशस्त-रत्न-किङ्किणी-कलाप-मध्यमञ्जुले।
करीन्द्र-शुण्ड-दण्डिका-वरोह-सौभगोरुके,
कदा करिष्यसि मां कृपा-कटाक्ष-भाजनम्॥ 9॥

अनेक-मन्त्र-नाद-मञ्जु-नूपुरारव-स्खलत्,
समाज-राजहंस-वंश-निक्वणाति-गौरवे।
विलोल-हेम-वल्लरी-विडम्बि-चारु-चङ्क्रमे,
कदा करिष्यसि मां कृपा-कटाक्ष-भाजनम्॥ 10॥

अनन्त-कोटि-विष्णुलोक-नम्र-पद्मजार्चिते,
हिमाद्रिजा-पुलोमजा-विरिञ्चजा-वरप्रदे।
अपार-सिद्धि-वृद्धि-दिग्ध-सत्पदाङ्गुलीनखे,
कदा करिष्यसि मां कृपा-कटाक्ष-भाजनम्॥ 11॥

मखेश्वरी-क्रियेश्वरी-स्वधेश्वरी-सुरेश्वरी,
त्रिवेद-भारतीश्वरी-प्रमाण-शासनेश्वरि।
रमेश्वरी-क्षमेश्वरी-प्रमोद-काननेश्वरि,
व्रजेश्वरी-व्रजाधिपे श्रीराधिके नमोऽस्तुते॥ 12॥